علاش بنك المغرب يقوم بتدخلات متناقضة ؟

في جوج سيمنات بنك المغرب ضخ 16.3 مليار ديال الدرهم في السوق الثانوي (أي السوق occasion ديال الأبناك التجارية) هاد الأمر تم بشراء سندات ديال الدولة 'Bons de trésor' من عند الأبناك.

هاد العملية هي عادية و عن طريقها بنك المغرب كيضخ السيولة أو المال في الإقتصاد باش يساعد على الإقتراض و الإستثمار.
و لكن ! أجي ماشي هادي 6 أشهر كنا كنتكلمو على العكس ؟

بالفعل، بنك المغرب بالزيادة في سعر الفائدة المركزي أو المرجعي 'Taux directeur" كيخلي الأبناك تقترض بفائدة أكبر و ذلك يعني تقديم فائدة في السوق أعلى و هادشي ماكيشجعش على الإقتراض و كيساعد على كبح التضخم. و هادشي كان ما بين شتنبر و دجنبر من العام الفارط حيت سعر الفائدة المركزي طلع ب 100 نقطة باش يوصل 2.5%.

السؤال هو علاش بنك المغرب واخد اجرائات متناقضة ؟

الجواب من عند بنك المغرب ما عندناش حيت مكاينش بلاغ و لكن كاين توقعات و الأرجح فيها هو بنك المغرب يحاول أنه يعاون العجز ديال الأبناك و نقص السيولة ديالهم لي تجاوز 80 مليار في 2022.
التوقع الثاني هو أنه مع رفع سعر الفائدة المرجعي، السندات مابقاوش كيتباعو في السوق الثانوي، يعني بهاد العملية بنك المغرب يحاول الحفاظ على قيمة السندات و فن نفس الوقت تسريح السوق الثانوية و السماح للسوق الأولية بمواصلة تمويل الخزينة.
هاد العملية كانت غادي تخلي الأسواق تخلع و كانت غادي تاثر على القيمة ديال الدرهم كون كانت العملة المغربية كتعرف تكهنات Spéculation أو كان الدرهم معوم 100%. و لكن لأنه هذا ماشي حال الدرهم و لأننا عندنا توازن في تبادل العملة يعني مكنشريوش العملة الصعبة بالدرهم حيت الحمد لله كاين تحويلات مغاربة الخارج مكاينش هاد التأثير. وخا Google مبين الدولار ب 17 درهم هاد نهار، فهذا فقط خطء.

المهم، هاد العملية ثارت الإنتباه ديالنا و كنتمناو بنك المغرب يعطينا تفسير. في إنتظار البلاغ نمشيو نقلبو شحال داير الدرهم في السوق اليوم.

‍

‍